Friday , May 20 2022
uren

سنڌسمال انڊسٽريز ۾ 435.4 ملين رپين جي ڪرپشن، رئوف صديقي،مشتاق علي لغاري، محمود احمد ۽ عبدالحئي ڌامراهه خلاف جاچ شروع

  عادل صديقي ۽ رئوف صديقي                

اسلام آباد ( سنڌسماءَ چار نيوز) سنڌ سنڌ سمال انڊسٽريز ۾ 435.4 ملين رپين جي ميگا ڪرپشن جي جاچ لاءِ نيب منظوري ڏئي ڇڏي آهي، نيب چيئرمين صنعتن ۽ واپار واري صوبائي کاتي جي اڳوڻن وزير رئوف صديقي، عادل صديقي ۽ ان جي آفيسرز ڊاڪٽر ثروت فهيم، مشتاق علي لغاري، محمود احمد، غلام نبي مهر، عبدالحئي ڌامراهه، سيد امداد علي شاهه، سيد اميد علي شاهه جي خلاف ڪرپشن ڪري اداري کي تباهي ڪناري پهچائڻ جي تڪڙي جاچ ڪرڻ جو حڪم ڏئي ڇڏيو آهي. نيب چيئرمين جسٽس رٽائرڊ جاويد اقبال جي صدارت هيٺ نيب جي ايگزيڪيٽو بورڊ جي خصوصي اجلاس ۾ سنڌ سمال انڊسٽريز، سميت وفاقي توڙي صوبائي کاتن ۾ ٿيل ڪرپشن جي جاچ جي منظوري ڏني وئي.

ان سلسلي ۾ سنڌ جي صنعتن ۽ واپار واري کاتي جي انتظامن هيٺ ايندڙ، سنڌ سمال انڊسٽريز واري اداري ۾ ٿيل 435.4 ملين رپين جي ڪرپشن واري معاملي تي ويچاريو ويو. نيب چيئرمين ٻن اڳوڻن صوبائي وزير ۽ ايم ڪيو ايم پاڪستان جي اڳواڻن رئوف صديقي ۽ عادل صديقي سان گڏ سمال انڊسٽريز جي آفيسرن ڊاڪٽر ثروت فهيم، مشتاق علي لغاري، محمود احمد، غلام نبي مهر، عبدالحئي ڌامراهه، سيد امداد علي شاهه، سيد اميد علي شاهه خلاف جاچ جي منظوري ڏني وئي. نيب جي ايگزيڪيٽو بورڊ جي اجلاس ۾ سرڪاري فنڊن ۾ گهوٻين ۽ سنڌ اسمال انڊسٽري ڪارپوريشن ۾ غير قانوني طريقي سان ڀرتيون ڪرڻ ۽ غير قانوني طور تي سرڪاري پلاٽن جي الاٽمنٽ ذريعي سنڌ حڪوم ت ۽ اداري کي اربين رپين جو نقصان بڻائڻ تي ذميوارن خلاف تڪڙي جاچ ڪري رپورٽ نيب چيئرمين حوالي ڪرڻ جو حڪم ڏنو ويو آهي.

نيب جي اجلاس ۾ اجلاس ۾ پشاور ڊويلپمنٽ اٿارٽي جي اڳوڻي ڊائريڪٽر جنرل صاحبزاده سعيد احمد، اڳوڻي ڊائريڪٽر جنرل سيد ظاهر شاهه، ڊائريڪٽر جنرل سير محمد،اڳوڻي  جنرل مينيجر محمد طارق ۽ اڳوڻي ڊائريڪٽر عبدالحليم پراچا ۽ ٻين خلاف انڪوائري جي منظوري ڏني. جوابدارن تي پنهنجي اختيارن جو ناجائز استعمال ڪندي پلاٽن جي الاٽمنٽ ۾ پلان مالڪن جي رولز جي ڀڃڪڙي ڪندي پلاٽ جي ڀرسان زمين ڏيڻ جو الزام آهي. جنهن سان قوني ناڻي کي تقريبن 75.27 ملين رپين جو نقصان رسيو. اجلاس ۾ طماش خان اڳوڻي ناظم/ايم پي اي پشاور جي خلاف انڪوائري جو فيصلو ڪيو ويو جنهن تي آمدن کان وڌيڪ اثاثا بڻائڻ جو الزام آهي.

ايگزيڪٽو بورڊ پاسڪو جي انتظاميا ۽ ٻين خلاف انڪوائري لاڳاپيل کاتي کي قانون جي موجب ڪارروائي لاءِ واپس موڪلڻ جو فيصلو ڪيو. اجلاس ۾ بلوچستان جي صحت واري وزير رحمت بلوچ ۽ ٻين خلاف انڪوائري جو فيصلو ڪيو ويو، انهن تي  آمدن کان وڌيڪ اثاثن جو الزام آهي. ايگزيڪٽو بورڊ عدم ثبوتن جي ڪري ڊاڪٽر محمد اسحاق فاني ڊائريڪٽر پروگرام فاصلاتي تعليم بهاو الدين ذڪريا يونيورسٽي ملتان جي خلاف انڪوائري ۽ فرنٽيئر ڪور آرگنائزيشن ۽ نيشنل هاءِ وي اٿارٽي جي آفسرن خلاف انڪوائري بند ڪرڻ جو فيصلو ڪيو. نيب چيئرمين جسٽس جاويد اقبال جي پڄاڻي تي چيو ته ملڪ مان بدعنواني جو خاتمو پهرين ترجيح آهي، نيب بنا امتياز ۽ قانون جي موجب ڪارروائين ۽ انويسٽي گيشن کي منطقي انجام تائين پهچائيندي ۽ ان سلسلي ۾ ڪو به دٻاءُ يا سفارش قبول نه ڪئي ويندي.نيب جي ايگزيڪٽو بورڊ جي اجلاس ليفٽيننٽ جنرل ريٽائرڊ جاويد اشرف قاضي، ليفٽيننٽ جنرل ريٽائرڊ سعيد اظفر، ميجر جنرل ريٽائرڊ حامد حسين بٽ، اقبال صمد خان، خورشيد احمد خان، بريگيڊيئر ريٽائرڊ اختر علي بيگ، عبدالغفار، محمد رمضان شيخ،  حسنين، پرويز لطيف قريشي ۽ داتو محمد خلاف بدعنواني ريفرنس داخل ڪرڻ جي منظوري ڏني، جوابدارن تي مبينا طور تي پنهنجي اختيارن کي ناجائز استعمال ڪندي قومي ناڻي کي تقريبن 2 ارب رپين جو نقصان رسايو.

اجلاس ۾ اڳوڻي چيئرمين واپڊا طارق حميد، اڳوڻي پاور واپڊا جي ميمبر محمد انور خالد، اڳوڻي واٽر واپڊا جي ميمبر محمد مشتاق، اڳوڻي واپڊا جي فنانس واري ميمبر امتياز انجم ۽ ٻين خلاف بدعنواني ريفرنس داخل ڪرڻ جي منظري ڏني. جوابدارن تي مبينا طور تي پنهنجي اختيارن کي ناجائز استعمال ڪندي نيپرا، پيپرا ۽ اي سي سي جي قانون جي ڀڃڪڙي ڪندي 150 ميگا واٽ جو رينٽل پاور پراجيڪٽ ميسرز جنرل اليڪٽرڪ انرجي پرائيويٽ لميٽڊ کي ٺيڪو ڏنو جنهن سان قومي ناڻي کي اربين رپين جو نقصان رسيو.

بورڊ جي اجلاس ۾ ڪيپٽل ڊويلپمنٽ اٿارٽي جي اڳوڻي چيئرمين  فرخند اقبال، اسٽيٽ جي اڳوڻي ميمبر خالد محمود مرزا، اڳوڻي فنانس ميمبر سي ڊي اي جاويد جهانگير ۽ ٻين خلاف انويسٽي گيشن جي منظوري ڏني. انهن تي مبينا طور تي الزام آهي ته هنن پنهنجن اختيارن جو جانائز استعمال ڪندي واپاري پلاٽن کي ڀڳڻن مٺ وڪرو ڪيو جنهن سان قومي ناڻي کي تقريبن 494.333 ملين رپين جو نقصان رسيو.

About Asghar Azad

Check Also

ايم آر ڊي جو اهم ڪردار سينيئر سياستدان مخدوم خليق الزمان لاڏاڻو ڪري ويو

Share this on WhatsAppمخدوم غلام محمد عرف مخدوم خليق الزمان ڪافي عرصو بيمار رهڻ بعد …

Leave a Reply

Your email address will not be published. Required fields are marked *