سنڌسماءَچار
Related Articles
ڪراچي( اسٽاف رپورٽر سنڌسماءَچار) پابندي مڙهيل تنظيم جي لاهور ۾ ڌرڻن کانپوءِ ڪراچي مختلف علائقن ۾ به ڌرڻا، ڪجهه علائقن ۾ پوليس سان چڪريون، فائرنگ ۾ ڪجهه ماڻهن جي زخمي ٿيڻ جا بهب اطلاع. پابندي مڙهيل تنظيم جا ڪارڪن ڪراچي جي لياقت، آباد / لالوکيت، ماڙيپور روڊ، لياري ۽ اورنگي ٽائون نمبر هڪ وارن علائقن ۾ رستن تي نڪري آيا، جن ڌرڻا هڻي روڊ بند ڪري ڇڏيا، جنهن جي نتيجي ۾ ٽريفڪ بند ٿي وئي. ڌرڻن وارن علائقن ۾ فائرنگ جا به اطلاع آهن. پوليس ذريعن جو چوڻ آهي ته مريپور جي دعا هوٽل واري علائقي ۾ ڌرڻي دوران مظاهرين کي ڇڙوڇڙ ڪرڻ دوران پوليس، رينجرز ۽ مظاهرين وچ ۾ چڪريون ٿي پيون، جنهن دوران ڪجهه ماڻهو زخمي ٿيا آهن. اورنگي ٽائون نمبر هڪ واري علائقي ۾ به فائرنگ جو واقعو پيش آيو آهي. نمائش چورنگي تي ڌرڻي لاءِ پهتل ڪارڪنن کي پوليس ۽ رينجرز ڀڄائي ڇڏيو آهي.
مفتي منيب الرحمان جي هڙتال واري سڏ کانپوءِ ڪراچي ۾ هاءِ الرٽ جاري ڪيو ويو آهي، سمورن ڊي آءِ جيز، ايس ايس پيز، سي تي ڊي ۽ لاڳاپيل اختيارين کي به الرٽ رهڻ جي هدايت ڪئي وئي آهي، گورنر هائوس، سي ايم هائوس، سنڌ سيڪريٽريٽ، آءِ آءِ چندريگر روڊ سميت اهم هنڌن تي پوليس ۽ رينجرز جو گشت به وڌايو ويو آهي، شهر جي اڪثر علائقن ۾ پيٽرول پمپس به بند ڪيا ويا آهن، مارڪيٽن، شاپنگ مالز ۽ ٻين ڪاروباري مرڪزن ٻاهران به سيڪيورٽي سخت ڪئي وئي آهي.
