Saturday , May 25 2024

“ هزارون خواهشين ايسي ڪه هر خواهش په دَم نِڪِلَي” ، ججز ۽ جنرلز احتساب کان آجا

اسلام آباد: ( سنڌ سماءَچار نيوز) پاڪستان پيلز پارٽي، ن ليگ، نيشنل پارٽي ۽ اي اين پي سميت پاڪستان جون سمسوريون سياسي پارٽيون ان ڳالهه تي هڪ پيج تي گڏجي ويون آهن ته، ملڪ ۾ احتساب ڀلي سڀني جو ڪيو وڃي پر ججن ۽ جنرلن جو احتساب ڪنهن به صورت ۾ نه ٿيڻ گهرجي، پي ٽي آءِ اڃا فيصلو نه ڪري سگهي آهي، جڏهن ته ميڊيا جي ٽاڪ شوز، پريس ڪانفرنسز، سيمينارن، عوامي جلسن ۽ نجي  ڪچهرين ۾ سمورا سياستدان دانهون ڪري چوندا آهن ته احتساب رڳو سياستدانن جو نه پر سڀني جو ٿيڻ گهرجي ۽ بنا ڪنهن فرق جي هجڻ گهرجي. پر سمروين پارٽين ان ڳالهه تي اتفاق ڪري ورتو آهي ته، متوقع نئين احتساب بل مان اعليٰ عدليه ۽ جنرلز جي احتساب واري حصي/شق کي ختم ڪيو وڃي.

ان سلسلي ۾ قومي اسيمبلي ۽ سينيٽ ۾ موجود سمورين سياسي پارٽين اعليٰ عدليه ۽ فوج کي احتساب جي دائري ۾ آڻڻ بابت شق کي تجويز ڪيل قومي احتساب ڪميشن جي قيام لاءِ غور هيٺ قانون جي مسودي مان ڪڍڻ تي اتفاق ڪري ورتوآهي. پارليامينٽ هائوس ۾ ڪميٽي جي اجلاس بعد قانون واري وفاقي وزير زاهد حامد چيو ته ججن ۽ جرنيلن کي احتساب جي دائري ۾ آڻڻ بابت شق کي پاڪستان پيپلز پارٽي واپس وٺي ڇڏيو آهي. قانون واري وفاقي وزير جي صدارت هيٺ ٿيل اجلاس ۾ پاڪستان تحريڪ انصاف جي ميمبر شيرين مزاري حڪومتي ميمبرن جي رويي ۽ پنهنجو موقف پيش ڪرڻ لاءِ مناسب وقت نه ڏيڻ تي احتجاجي طور واڪ آئوٽ ڪيو. ياد رهي ته پاڪستان ۾ ڪرپشن جي روڪ ٿام لاءِ موجود قومي احتساب بيورو جي جڳهه قومي احتساب ڪميشن قائم ڪرڻ لاءِ قانون جو مسودو پارليامينٽ ۾ ڪميٽي سطح تي غور هيٺ آهي. مخالف ڌر جماعت پاڪستان پيپلز پارٽي جي سينيٽر فرحت الله بابر تجويز ڪيل قومي احتساب ڪميشن جي دائره اختيار کي ججن ۽ جرنيلن تائين وسيع ڪرڻ لاءِ غور هيٺ قانون جي مسودي ۾ شامل ڪرڻ جي تجويز ڏني هئي.

قانون واري وفاقي وزير زاهد حامد چيو ته مخالف ڌر جي ٻين جماعتن پاڪستان تحريڪ انصاف ۽ جماعت اسلامي به اعليٰ عدليه ۽ فوج کي احتساب جي دائره اختيار ۾ آڻڻ جي مخالفت ڪئي آهي. وفاقي وزير جو چوڻ هيو ته تجويز ڪيل احتساب جي قانون جي دائره اختيار ۾ عدليه ۽ هٿياربند فوجن کي نه آندو ويندو ۽ سمورين جماعتن ان نڪتي تي اتفاق ڪيو آهي. زاهد حامد جو چوڻ هو ته احتساب ڪميشن ڪميشن جي نئين سِري سان جوڙجڪ بعد نيب ۾ سمورين التويٰ هيٺ انڪوائريون ۽ ڪيس ٻين عدالتن ۾ منتقل ڪيا ويندا، زاهد حامد جو چوڻ هيو ته ڪرپشن جا ڪيس احتساب ڪميشن يا نئين عدالتن کي منتقل ٿيڻ باوجود ختم نه ٿيندا ۽ نه ئي شروع ڪيل جاچ ختم ڪئي ويندي.

قانون واري وفاقي وزير ٻڌايو ته، 1999 ۾ ٺاهيل نيب جو قانون تمام گهڻو سخت هو. احتساب جو اهڙو قانون بڻائڻ چاهيون ٿا، جنهن ۾ انصاف به هجي ۽ احتساب به هجي، اجلاس ۾ پاڪستان تحريڪ انصاف ۽ جماعت اسلامي نيب کي ئي برقرار رکڻ ۽ ان جي ڪارڪردگي کي وڌيڪ بهتر بڻائڻ تي اتفاق ڪيو آهي. پاڪستان تحريڪ انصاف سان تعلق رکندڙ قومي اسيمبلي ميمبر ڊاڪٽر شيرين مزاري جو چوڻ هيو ته اها ججن ۽ جرنيلن کي احتساب جي دائره اختيار ۾ آڻڻ جي تجويز سان اتفاق نه ٿي ڪري. هن چيو ته احتساب ڪميشن جي سربراهه جي مقرري ۾ اپوزيشن ۽ وزيراعظم وچ ۾ مڪ مڪا نه ٿيڻ گهرجي، تحريڪ انصاف جي ميمبر جو چوڻ هيو ته حڪومت قومي احتساب ڪميشن جي بل ۾ پاڪستان تحريڪ انصاف جي تجويزن کي شامل ڪرڻ لاءِ تيار ناهي، هن چيو ته پاڪستان تحريڪ انصاف احتساب ڪيمشن لاءِ پنهنجون ترميمون پارليامينٽ ۾ آڻيندي.

About Asghar Azad

Check Also

ماحولياتي تبديلين کي سمجهڻ لاءِ ميڊيا اهم ڪردار ادا ڪري سگهي ٿي

ماحوليات بابت رپورٽنگ ڪندڙ صحافين جي لاءِ فورم ھجڻ جي سخت ضرورت آھي، تقريب کي …

Leave a Reply

Your email address will not be published. Required fields are marked *