Thursday , May 30 2024

ارسا جي اُرهه زورائي، ربيع ۾ ڪوٽڙي ڊائون اسٽريم لاءِ رڳو ڏهائي 4 ايم اي ايف پاڻي ڏيڻ جو فيصلو

ڪراچي( رپورٽ: اصغر آزاد   سنڌسماءَچار) انڊس رور سسثٽم اٿارٽي(ارسا) پنهنجي هوڏ ۽ ارهه زورائي برقرار رکندي سنڌ کي 1991 واري پاڻي ٺاهه تحت پاڻي ڏيڻ کان جواب ڏيندي ربيع جي سموري مند دوران رڳو ڏهائي 5 هزار ڪيوسڪ پاڻي روزاني بنيادن تي ڏيڻ جو فيصلو ڪيو آهي، ارسا ترجمان جو چوڻ آهي ته، سنڌ کي 38 ايم اي ايف کوٽ جي حساب سان صرف ڏهائي 4 ايم اي ايف پاڻي مهيا ڪري سگهبو. ارسا ربيع جي مند لاءِ سنڌ ۽ پنجاب کي 38 ايم اَي ايف کوٽ سان پاڻي ڏيڻ جو فيصلو ڪري ڇڏيو، ارسا جي صلاحڪاري ڪميٽي جي اجلاس دوران ربيع جي مند دوران ڪوٽڙي ڊائون اسٽريم ۾ رڳو ڏهائي 4 ايم اَي ايف پاڻي ڇوڙ ڪرڻ جو فيصلو ڪيو ويو آهي. اجلاس دوران موسميات کاتي بريفنگ ڏيندي چيو آهي ته ربيع جي مُند ۾ معمول کان گهٽ برساتون پوڻ جو امڪان آهي، آڪٽوبر ۽ نومبر ۾ ڪنهن حد تائين برسات پئجي سگهي ٿي.

ارسا هميشه جيان هن ڀيري به ربيع جي مند ۾ پاڻي جو طئه ٿيل مقدار ڏيڻ لاءِ تيار ناهي، هر ڀيري جيان پاڻي جي کوٽ جو کاتو سنڌ جي حصي ۾ ڏيندي ربيع جي مد دوران 38 سيڪڙو سنڌ پاڻي جي کوٽ کي برداشت ڪرڻي پوندي. پاڻي جي 1991 واري ٺاهه ۽ بعد ۾ 2005 ڌاري وفاقي سرڪاري پاران پاڻي جي عالمي ماهرن جي تجويزن تي هڪ ڀيرو به عمل ناهي ڪيو ويو.  پاڻي جي 1991 واري ٺاهه موجب ڪوٽڙي ڊائون اسٽريم ۾ پورو سال لڳ ڀڳ 10 ملين ايڪڙ فوٽ (ايم اي ايف) پاڻي ڇوڙ ڪرڻ لازمي آهي. ان کانسواءِ 2005 ۾ وفاقي سرڪار جي صلاح سان پاڻي جي عالمي ماهرن پاران ڪيل هڪ سروي ۽ ان جي بنياد تي تجويز ڪيل پاڻي به مهيا نه پيو ڪيو وڃي.

عالمي پاڻي ماهرن تجويز ڪيو هو ته ڪوٽڙي ڊائون اسٽريم ۾ روزاني جي بنياد گهٽ ۾ گهٽ پنج هزار ڪيوسڪ پاڻي ڇوڙ ڪرڻ لاءِ وهندو رهي. ماهرن اهو به تجويز ڪيو هو ته پاڻي جي چاڙهه وارن ڏينهن دوران گهٽ ۾ گهٽ 5 ايم اي ايف پاڻي روزاني جي بنياد تي ڪوٽڙي ڊائون اسٽريم ۾ ڇوڙ ڪرايو وڃي. 91 واري پاڻي ٺاهه ۽ پاڻي ماهرن جي تجويزن مان ڪنهن هڪ تي به عمل نه پيو ڪيو وڃي، جنهن جي نتيجي ۾ ڪوٽڙي ڊائون اسٽريم زرعي طور تباهي جي ڪناري تي پهتل آحي، ڪيترن ئي علائقن ۾ پيئڻ جو پاڻي به ميسر نه ٿو هجي. ان کانسواءِ اڊس ڊيلٽا مڪمل طور تي تباهه ٿي چڪو آهي ۽ سمنڊ جون ويرون روزانو وڌي رهيون آهن.

About Asghar Azad

Check Also

“صدين کان آباد پنهنجا ڳوٺ خالي ڪيو”، ملير جي ڳوٺاڻن کي نادر شاهي حڪم

“صدين کان آباد پنهنجا ڳوٺ خالي ڪيو”، ملير جي ڳوٺاڻن کي نادر شاهي حڪم   …

Leave a Reply

Your email address will not be published. Required fields are marked *